奧運馬術賽曲終人散，但矗立喺沙田馬術場地嘅巨型「祥雲」火炬聖火繼續燃燒，直至星期日京奧閉幕禮先同步熄滅。呢兩日颱風鸚鵡襲港，聖火會唔會被吹熄呢？
火炬設計防水防風
最後一場馬術賽時已經掛三號風球，場內微風陣陣，聖火被吹到搖擺不定，噚日九號風球更加危險，八方聽聞馬術公司都頗緊張，一早就派人睇吓火炬有冇異樣，好彩冇事。賽事場地附近銀禧花園可以望到聖火，有居民話畀八方知，噚日下晝都幾大風雨，不過聖火面對狂風暴雨仍然好旺盛，冇俾強風吹熄。
聖火喺奧運舉行期間唔可以熄滅，因此北京鳥巢支火炬有多重防風防水措施，有保護罩擋風避雨，據講用3支高壓水槍都射唔熄，甚至可抵受十級暴風，至於香港支火炬有冇咁犀利，馬術公司不允透露，只係話支巨型火炬有獨特設計，防水又防風，所以喺九號風球之中都力保不熄。
唔少人出「行」力讚馬術賽精采又好氣氛，政務司司長唐英年據講日日都捧場㖭，錯過嘅市民，下月7日至11日可以「補飛」，欣賞殘奧馬術賽，據講門券每張30蚊啫。