俗語有話行行出狀元，今年榮膺世界十大傑青甄韋喬嘅奮鬥故事，就引證咗呢句說話。佢8歲時由恩平移居香港，居於灣仔舊樓板間房，為咗幫補家計，佢中三就輟學倒垃圾維生。倒垃圾一向被視為厭惡性行業，清潔工人經常被人歧視，原來世界傑青都有過被歧視嘅經驗。
甄韋喬話好記得有一次喺商場做緊潔淨地板工作，碰巧一個師奶就搵佢做教仔「人辦」。師奶同個仔講要畀心機讀書，否則就要做洗地咁冇出色，要做「垃圾仔」。聽完呢番說話，甄韋喬話唔覺得內心受到好大傷害，因為當時做清潔，每月收入有成兩萬幾蚊，夠養家有餘，隨時高過一般白領打工仔，反而最令佢難以釋懷嘅係，清潔專業不獲尊重。
今時今日嘅佢，已經係一間大型清潔公司主席兼董事總經理，旗下員工逾2,000人，相信當日睇佢唔起位師奶，真係跌爛眼鏡，估唔到倒垃圾倒出彩虹。