蘋果批Online
《蘋果批Online》逢星期一、三、五晚上九時開騷
Click入http://pie.appledaily.com收看
歡迎透過web-cam即時發表意見或致電29908648安排親身上場
電郵：mailto:[email protected]
網誌：http://pieatapple.wordpress.com
醫學界係公認嘅專業界別，但同行間嘅拗撬並唔比其他界別少。喺《蘋果批》選舉論壇入面，候選人就多年來嘅恩恩怨怨，進行激辯……
主持：李兆富 楊卓華
有冇撐加人工？
梁家騮：
上年前線（醫生）爭取同工同酬遊行請願，蔡堅醫生曾問你點解冇去到，當時你嘅答案話﹕內部傾過，決定咗你（何栢良）負責做「白臉」，我梁家騮同前線醫生同事就做「黑臉」……請你確認呢個講法。
何栢良：
（早在）喺2006年時，阿騮你應該記得……當時有十幾個PDA（公共醫療醫生協會）同事，出嚟參加行政長官選委會嘅選舉，當時選委會政綱已清楚講明，我哋主要會幫同事爭取同工同酬……
梁家騮：我係想問黑臉、白臉嘅問題……
何栢良：
我冇講過我做白臉，阿騮做黑臉……（黑臉、白臉）唔係指個別一兩個人，而係指喺爭取加人工時候，我哋要用唔同嘅策略。
個人誠信係點？
郭家麒：
2002年同1999年，有兩件事引起公眾反響：一件係喺楊醫生診所內，涉及美沙酮丸……第二件係閣下作為屋邨醫生協會（新邨西醫協會），為咗自己診所條邨嘅利益，三次將工會決定阻遲，令公眾或許醫生無法信服你……
楊超發：
美沙酮事件係一件抹黑事件，過咗成八年，當年已經過警務處同衞生署檢核過，清清楚楚我係清白嘅……第二件關於青衣我間診所嘅事件，每次開會我都係缺席嘅，因為（知道）本身有利益衝突。
點解冇得豁免「語言歧視」？
楊超發：
種族歧視法案通過咗，點解你（郭家麒事前）唔諮詢業界？……你竟然淨係諮詢醫學會會長，我身為醫學會會董，竟然唔知呢件事，好多醫生同我投訴：郭醫生冇諮詢業界，亦唔知業界（有關提供繙譯）嘅煩惱喺邊度。
郭家麒：
好多香港市民明白點解要做呢樣嘢，（楊超發）唔好曲解呢樣嘢，因為呢個條例，並冇叫醫生犧牲自己；醫生同其他人一樣，唔（應該）去歧視人……
四個邊個最幫到業界？
何栢良：
楊醫生，四年之前你大力支持郭醫生參選，咁點解你今日又自己走出嚟參選立法會？
楊超發：
呢四年，我見郭醫生喺立法會做咗好多政制同民主嘅發展，但業界問題，郭醫生完全冇幫到手……有一次同領匯開會……（郭家麒）因為某會會長唔鍾意同領匯開會，就（中途）走咗……
郭家麒：
（離場原因是）當我哋發覺一個自稱代表醫生爭取權益嘅會，居然同領匯走埋一齊，放棄要爭取嘅權利……我哋發覺好唔妥，所以當時我同醫學會會長，同執業屋邨醫生協會覺得，我哋唔應該妥協。
梁家騮：
（以上辯論）各位選民可以觀察得到，我受攻擊嘅情況好似比較少……我觀察得到原來我係醫學界內唯一各個sector都可以接受嘅候選人……