煲呔又孭多一鑊，而且十分大鑊！特首辦兼煲呔官邸禮賓府，近日安裝多一隻俗稱「鑊」嘅衞星天線，呢隻鑊十分巨型，估計直徑有五米，非常矚目，路過禮賓府實見到，煲呔安多隻鑊做乜呢？
唔係用嚟睇奧運或者英超，而係方便了解國情，禮賓府方面話特首要睇多啲鄰近地區電視台，由於本港各電視台提供選擇唔夠多，所以要安裝新天線；至於工程費用多少，暫時未能提供資料，有業內人士估計連工包料以十萬元計，實際幾多錢就視乎工程複雜程度。
或影響煲呔健康
禮賓府係香港管治核心，有人思疑突然多隻鑊，會唔會影響風水，甚至破壞龍脈，損害香港運勢呢？坊間流傳特區政府最高層唔想有人洩露天機，所以煲呔已經冇搵龍師傅指點迷津，今次安裝巨鑊前有冇睇風水，官府發言人話唔清楚。八方請教玄學家麥玲玲，佢話一般而言，電話、電視天線都不利風水，普通魚骨天線都有影響，何況咁大隻鑊，影響隨時可大可小。
麥師傅指出，電線電波會令磁場失衡，風水學角度即係影響咗禮賓府嘅氣，亦有可能影響健康，不過佢話安裝天線本身未必影響風水，最重要係喺入面居住或工作嘅人，唔好望到隻鑊就得，「如果望到隻鑊，即係面對形煞，咁凡事都會較多阻滯，對眼睛、喉嚨都唔係幾好。」
化解形煞都唔係太難，麥師傅話可以嘅話，最好搬一搬位，如果嫌麻煩，喺窗前加塊紗簾遮擋亦可，「只要視線水平唔好直接望到就冇大問題。」呢隻大鑊，又會唔會令煲呔民望更差，政府管治更唔掂呢？麥師傅認為政府施政備受批評，好似做乜都唔妥咁，同孭多隻鑊關係不大，而係流年不利，所以今年諸事不吉。
捱過今年，麥師傅預期出年政府形勢會好轉，煲呔民望有機會反彈，因為明年高官人緣運普遍都幾好，即係做事易得民心，但同時要慎防桃花劫，唔係煲呔有醜聞，而係有高官隨時行差踏錯，至於係邊位高官，佢話呢啲嘢唔可以隨便講，否則佢自己先惹麻煩就弊。
話分轉頭，煲呔日理萬機，抗通脹、推政改、搞經濟忙到出煙，仲有幾多時間睇其他省市電視呢？眼前問題未搞掂，睇電視都唔會迎刃而解。
mailto:[email protected]