昨日橫風橫雨喺屋企同家姐煲電話粥，佢話嚟緊星期日約咗班師奶團北上揼骨Shopping，順便同囝囝買啲開學文具，價錢比香港平一半。佢仲叫埋我一齊去。我叫家姐買還買，但係要小心啲揀，買中啲有毒嘅蠟筆等文具就得不償失。
唔係小妹過慮，消委會都好關注巿民北上買文具。消委會老友話，內地喺今年4月實施強制性嘅《學生用品的安全通用要求》，幾乎包括所有文具，好似水彩繪畫顏料、蠟筆、粉彩、軟擦膠、塗改用品等，特別對有害嘅元素同有機劑如鉛、汞、甲醛、苯等有嚴格規定最大限量。
香港買亦需小心
有規限即係證明內地文具參差不齊啦。老友話，巿民買文具都要識啲竅門，特別係買顏色筆、蠟筆呢啲繪畫顏料，一定要留意產品包裝有冇標示符合《玩具及兒童產品安全條例》嘅安全標誌如EN71、ASTMF963或者ISO咁。如果冇呢啲安全標誌，或者冇列出入口商資料、品牌名稱，適用年齡等，最好唔好買。
仲有，買一啲手工剪刀、刀片等頂端宜為圓弧頂，唔好揀銳利尖端。間尺、文具盒可觸及的邊緣或邊角等，唔好有利邊或尖端。作業本或畫簿等唔好選非常白嘅，減低接觸過量漂白劑或化學物質的機會；軟擦膠最好冇香味嘅。
老友補充話，返內地買文具當然要小心，喺香港買都唔可以掉以輕心，因為唔少文具都係大陸貨。其實買文具應該以簡單、實用同輕盈為原則，有助減輕書包重量，太花巧嘅文具仲會分散學童上課嗰陣注意力。
電郵：mailto:[email protected]
逢周六、周日刊出