舊年中，滙豐銀行前亞太區行政總裁邵銘高俾澳洲第三大銀行集團澳紐銀行（ANZ）重金挖角，臨離職前，邵銘高留低咗一句說話──喺同一機構作終身職業嘅觀念，正喺全球逐漸消失。
一語成讖，日前獅子行台灣區公佈，佢哋總裁顧銳賢（AlistairCurrie）已經辭職。據台灣《經濟日報》報道，顧銳賢以個人理由辭職，做到10月底就唔做，報道話佢將過檔ANZ，做邊個位仲未知，而獅子行亦即刻搵咗亞太區客戶服務主管NickWinsor接替。
顧銳賢過檔澳紐銀行
換言之，顧銳賢將會同邵銘高再做同事，不過，呢次顧銳賢過檔，唔多唔少令人聯想，係咪同邵銘高有關，因為早喺邵銘高舊年離開獅子行時，就有路邊消息指，有人跟咗佢走。
不過，獅子行嘅高層喺市場都幾搶手，邵銘高轉工前，獅子行嘅投資管理亞太區行政總裁、有基金界一哥稱號嘅裴布雷（BlairPickerell），就被大摩挖角。