是日金句：就算骨折了也要爬到終點！
─內地網民
以前，香港的打工仔，推崇襟撈精神：搵食由低做起，工字有出頭。
以前打工仔對工時的概念：「老闆唔走，我唔收工！」記得我的頂頭上司，加上公司主席，在最緊張的打仗時期，風雨不改，晚晚OT，早則收九點，晚則凌晨一兩點。難得有機會與公司一起並肩作戰，我自當誓死相隨，宵夜直落。即係話，以前的打工仔，若收咗工，正用晚餐，收到同事電話，謂老闆急召開會，為表現襟撈精神，他們會從容就義，置那份晚餐於不顧，即時折返公司開會。
襟撈落伍時興權益
其他襟撈的表現，仲有唔少，例如同事之間鬥早返工，見人要SayGoodMorning，甚至帶病照返工、食晏睇醫生，通通是襟撈的表現形式，之但係，襟撈的核心，思哲認為是「犧牲小我，完成工作」，黃子華嘅說法「鞠躬盡瘁，死而後已」，則比較沉重。
時至今日，明白襟撈精神的香港人，大概剩低曾特首。現今的香港打工仔，經過歲月洗禮，對佢哋而言，襟撈已經落伍，取而代之嘅精神係「權益」。即係「老闆走開，我就收工」，又或者「犧牲工作，完成自我」，返工上古惑仔online創業。只不過，香港嘅襟撈精神，雖然沒落於本土，卻似乎在內地得以延續！
骨折也要爬到終點
早幾日，劉翔在鳥巢亮相三分鐘、在跑道上扯下號碼貼，頭也不回地決絕退場。隨即，網上特有襟撈精神的同胞，紛紛出言激辯：「你不應該叫劉翔，你改名字叫劉降。」「膽小鬼！逃兵！丟盡國人的臉！」有人甚至提出：「就算骨折了也要爬到終點！」
從內地同胞對劉翔提出的意見，佢哋已經擁有像曾特首一樣，為求做好份工，不惜一切，鞠躬盡瘁，死而後已的襟撈精神。不過，思哲認為，即使基於襟撈精神，我哋唔應該怪責劉翔，因為我們不能排除係老闆唔畀佢返工的可能性。換言之，退出，亦有可能係公司安排，「阿翔，你病得咁重，喺屋企唞吓啦，費事返工惹到13億同事啦！」
網誌： http://wanszezit.wordpress.com/
電郵：mailto:[email protected]