欄王劉翔係中國田徑項目嘅猛將，可惜腳傷未能出戰京奧。恒地（012）李兆基四叔手下都有一名猛將，專睇內地業務，就係執董孫國林。
宏調措施醫樓市
孫國林噚日同華華講，喺電視上見到劉翔決定唔跑，雖然好失望，但相信佢都唔想。仲話既然腳傷，唔勉強出賽呢個決定係啱嘅，就好似佢哋做生意，見大陸房地產有泡沫，仲要夾硬上，只會令自己更傷。
孫國林話，做生意同體育一樣，遇上內地房地產有泡沫，就好似劉翔帶傷上陣咁，若然夾硬上場，盞搞到自己傷上加傷，倒不如醫好個傷先再嚟過。
佢打譬如話，好似中央出宏調措施醫番內地樓市，醫咗年幾，家陣到尾聲，個市唔使再用柺杖，相信好快會好番。所以佢預期樓價會逐步回穩，始終調控後個市就好似醫好個傷，比較健康咁話。