𠵱家香港人對家庭影院嘅要求越嚟越高，全高清薄屏電視機一定唔少得，加埋一套高清AV擴音機，無論睇數碼電視節目同Blu-ray藍光影碟，真係聲靚畫面正；要求再高啲，最多咪玩埋投影，買啲再貴啲嘅高階器材，但點都離唔開影音範疇。
影音專家Alan話，咁樣諗係大錯特錯，影音之外，可以加埋動感；歐美興起嘅動感家庭影院開始吹嚟香港。好似全球首部家用嘅D-BOX動感系統啱啱登陸香港，佢同巿面一啲同類會「震」嘅產品唔同嘅地方，在於佢係唯一一部「搖動」，而唔係震嘅產品。
搖動系統約售10萬蚊
Alan解釋，系統嘅大腦喺D-BOX動感控制器，連接一個裝喺沙發底嘅台架，另連接Blu-ray或DVD播放器。當控制器收到支援D-BOX系統嘅Blu-ray或DVD影碟音頻訊號，會驅動台架跟隨畫面搖動，用家可親身感受飛車時嘅晃動，煞車時嘅回震。
小藍即刻親身試，Alan放播《虎膽龍威4.0》最開頭飛車片段。內容係男主角布斯韋利士揸住部車，俾直升機追住狂掃，子彈橫飛。小藍原本坐喺張沙化度突然做咗男主角，沙發變成駕駛位，配合畫面，部車左衝右突。當部車衝入隧道，迎頭有部車撞埋嚟，系統產生嘅回震效果，小藍向前衝一衝，心口好似俾人打咗一拳咁。又好鬼死刺激，不過要加番條安全帶先得。Alan話，無論單座位或多座位嘅沙發都裝得，價錢大約10萬蚊起。
逢周五刊出