天氣難測，所以天文台成日俾人鬧預測風球唔準，應該掛八號風球卻掛3號，明明似係三號風球，又掛個八號波出嚟，總之就估佢唔到好得意，今次鸚鵡殺到埋身就一反常態，噚日中午時分，好多人陸續透過電郵或MSN收到風，話貨櫃碼頭、機場等大機構，收到天文台通風報信，今日會掛八號風球，甚至九號、十號。
好多人都疑惑，點解天文台唔第一時間通知市民，先一步通知大機構呢？後來天文台澄清，佢哋冇提供「特別服務」畀大機構，發放風球消息一視同仁。雖然天文台澄清，不過大家都當網上流傳嘅颱風消息真嘅一樣，繼續吹水預測鸚鵡動向，希望快啲收到風，早啲收工。
官員打風前要趕工
網上吹水同鸚鵡風力一樣越吹越勁，直撲政府總部，有官員私下同八方講，今次事先張揚掛八號風球，吹亂埋工作安排，由於老闆們認為今日唔使返工，所以即時指示，本來今日先到限期完成嘅工作，噚日放工前要趕埋先收得工，忙到出煙。
打風唔係講玩，隨時搞出意外，不過部份網民對鸚鵡來襲十分雀躍，原來星期二開始，已經有人喺網上呼籲全港打工仔，一齊運用念力嘗試改變鸚鵡走勢，希望今個星期真係打得成風，可以放多一日假。呢個提議天方夜譚擺明吹水，前日仲有好多人認為咁做得啖笑，估唔到噚日風向一轉，鸚鵡真係吹到正，網友話今次發功有成，證明網民力量真係唔可以睇小，八方覺得網民吹水力量先至唔可以睇小，正一吹水唔抹嘴。
颱風得一個，風暴消息卻有好多唔同來源，唔通香港唔止一個天文台？企埋一邊「睇水」嗰種天文台，八方知道街頭巷尾有唔少，預測天氣就唔多見，近排興幕後代唱，為咗國家利益，台前嗰位唔方便真唱，就要搵人喺背後發功，莫非香港都有個幕後天文台，為咗國家利益同形象，使橫手發佈天氣消息？
打風前夕，人人都想第一時間知道風暴消息，噚日網上流言亂竄，反映天文台𠵱家發放消息方式追唔上市民需要，大家惟有自己想辦法，如果天文台以民為本，市民就唔使亂收風啦。
mailto:[email protected]