名鋼琴家郎朗喺奧運開幕禮中彈奏《星光》一曲，動聽鳥巢，不過近日有人質疑他事前錄音，喺開幕禮上只係扮彈琴，唔係現場演奏。天真小女孩林妙可美妙歌聲，被揭發原來係幕後代唱，如果郎朗都出蠱惑，開幕禮又多一個瑕疵。
「按國際規格錄影」
噚日郎朗同佢爸爸出席山頂杜莎夫人蠟像館活動時，八方當面問佢此事，佢答得十分玄妙，「其實是按照國際大型製作正常規格錄影。」錄影？即係唔係現場彈奏啦，郎朗又話唔係，八方再問佢當晚有冇嚟真彈琴，佢咁答：「當然有彈！」
郎朗以優才計劃成為「香港人」，喺香港大展拳腳，前晚到會展出席名車Audi活動，噚日又去山頂杜莎夫人蠟像館為佢個蠟像揭幕，更即席演奏奧運開幕名曲《星光》，呢次如假包換，唔係錄影。郎朗個蠟像上身着西裝，下身着牛仔褲同波鞋，斯文、活力融於一身。