今個月係港府入市打大鱷10周年，話說政府當年入市，惹嚟市場唔少批評，指摘干預自由市場運作，矛頭除咗指住當年財爺、家陣貴為特首嘅曾蔭權，負責香港金融穩定嘅金管局總裁任志剛當然亦冇得置身事外。佢俾人哦足幾年，話唔捍衞香港自由市場。噚日任總喺佢嘅每周專欄《觀點》回顧過去，好坦然話，時間可以證明政府入市嘅決定正確，一抒10年以嚟心中鬱結。
任總諗番10年前有唔少深刻回憶，包括「一直以來作為自由市場的信奉者對自由市場運作失效的失望；來自四方八面的非議；以及當時設於萬國寶通銀行大廈的心戰室（即金管局舊址）。」雖然任總對自由市場失效感失望，但佢補充，信奉自由市場至今不變，「只是立場較以往多了點審慎」。
任總仲話，慶幸「今天越來越多人認同政府當年的入市行動」，究竟係邊啲人表示認同？華華相信任總應該講緊美國聯儲局主席伯南克，因為近期美國為咗救經濟，聯儲局亦多番出招，好似借錢畀摩根大通收購貝爾斯登嗰單嘢咁。美國一向標榜自由，咁做惹嚟唔少非議。
伯南克成知音
華華咁諗唔係亂估，任總喺專欄講到，「現時已發展國家在金融市場採取的對策會像當年香港的入市行動一樣，即使引起爭議，最終證明是正確的。」
任總仲提到今年係金管局成立15周年、聯繫滙率成立25周年，但家陣世界咁亂，都係低調慶祝。不過，打大鱷10周年呢單嘢，就不妨高調一啲為自己平反喇呵！
電郵：mailto:[email protected]