睇電視節目《Survivor》（生還者），參賽者頂唔住挑戰，玩吓少一個玩吓又少一個。大陸A股市場已經過咗18個年頭，A股公司董事長何嘗唔係參加緊《Survivor》比賽。
據《證券日報》報道，喺深滬兩市最早上市嘅200間公司，到目前為止，剩番8家公司嘅董事長，仍然屹立不倒。當中香港人比較熟識嘅係萬科董事長王石，其次仲有美的電器何享健，同埋生產中華牌鉛筆嘅中國鉛筆胡書剛。
大陸公司18年仲可以揸fit唔簡單，好多老總因為貪，最後都銷聲匿迹。至於呢8位董事長能夠留低，梗有啲本事。就以萬科董事長王石為例，佢要求公司發展最緊要夠專一，由多元化業務發展至專做房地產，之後再集中起住宅樓，𠵱家集中資源喺北京、深圳、上海同天津。仲有佢曾經講過25%利潤以上唔做，結果安然度過多次宏調。