民主黨李永達喺新西陷於苦戰，民調數據顯示佢形勢不妙，隨時歷史重演上唔番車，不能連任真係跳海都唔掂，可能見楊森早前跳海後支持度反彈，阿達有樣學樣真係走去跳海。主席何俊仁上屆選舉，都試過露兩點跳海拉票，馬丁又下海助選，唔通白鴿黨候選人寧舍熟水性，定係佢哋五行欠水，所以要濕身拉票？
陳偉業支持度趨升
楊森跳維港，水質雖然麻麻但都可以接受，阿達今日跳青衣海，真係望到都窒步，佢竟然跳落去，可見選情實在不太樂觀，否則唔使搵命博。新西議席最多，向來都係一場混戰，今年公民黨張超雄殺入新西，令局面更加混亂，民主派候選人互相廝殺，票源越分越薄，冇人夠膽話自己已經夠票當選，社民連陳偉業支持度趨升，阿達唔驚就假，如果好似幾年前咁冇得上車，未來幾年在野，真係唔知仲有冇機會東山再起。
阿達跳海係要反對青衣填海興建10號貨櫃碼頭，擔心影響交通、空氣、水質，又會帶來噪音等，總之就好多問題。民主黨所謂「張、李、楊」集團，已經先後有兩個人跳海，張文光連任教育界應該好穩陣，相信唔使跳海啩。