爭氣吧，棄將！周六英超戲碼一般，不過就話題性爆燈，「前熱刺3寶」就帶領新特蘭，作客熱刺；人要面樹要皮，占邦達、馬白蘭基同泰尼奧要爭氣，話畀人知熱刺放佢哋走係大錯特錯。牽牛
「前熱刺3寶」占邦達、馬白蘭基同泰尼奧唔識廣東話，如果唔係佢哋都想唱李蕙敏首本名曲《活得比你好》；占邦達可能係3人之中怨念最重嗰位，佢06年以450萬鎊（約6,550萬港元）從韋根加盟熱刺，一心諗住過吓大會癮；上季熱刺兩閘傷兵多，伊高圖同加里夫巴利長期養傷，踢開右閘嘅占邦達都抵得諗，串演埋左閘，上陣49次入3球，聯賽盃決賽假假哋都有份參與，唔係贏呢個盃，熱刺領隊拉莫斯個位邊有得咁穩陣；𠵱家加里夫巴利傷好，就將占邦達一腳踢去東北，真係唔嬲就假。
棄將射垮熱刺有前科
對占邦達嚟講，好在仲有馬白蘭基同泰尼奧陪佢，以佢哋名氣，嚟到新特蘭自然成為球迷寵兒，揭幕戰雖然輸畀利物浦，不過新特蘭球迷投票中，馬白蘭基以36%選票成為該仗新特蘭最佳球員；而且喺官網首頁，就用「前熱刺3寶」嘅相出征熱刺，擺明挑起佢哋嘅戰意。可惜泰尼奧因肌肉疲勞，未必上陣。
熱刺近年球員出入好似「走馬燈」，俾棄將搞掂唔係冇前科；聯賽揭幕戰作客輸畀米杜士堡1:2，幫米堡入第2球嘅「埃及王子」美度，05年加盟熱刺，一度成為熱刺粉絲追捧對象，亦都入過唔少靚波；不過長期受傷，美度多個肚腩，就俾熱刺賣去米杜士堡；如果周六「前熱刺3寶」又發威，大事增兵嘅熱刺開季兩場不勝，拉莫斯會唔會後悔賣走佢哋呢？
英超：熱刺vs新特蘭
開賽時間：周六10:00pm
直播：now631台
甩漏蘇連遜倒戈維拉
禮拜六又有另一位棄將對番舊東家，佢就係史篤城門將蘇連遜，佢要幫呢支升班馬主場頂住大勇嘅阿士東維拉；不過講真，蘇連遜上季屙蛋、甩手乜都有佢份，以維拉前鋒艾邦拉荷上場入3粒咁勇，心諗以前練波時都知蘇連遜唔穩陣，仲唔搏命射爆佢為止？
英超：史篤城vs阿士東維拉
開賽時間：周六10:00pm
直播：now634台
荷甲射手對碰
荷甲神射手以前係信心保證，朗拿度、雲尼斯達萊都出晒位，不過自從基士文之後，荷甲神射手就好似得啖笑；今次利物浦對米杜士堡，就有04年荷甲神射手古積特，對06年荷甲神射手艾方素，唔好話你哋兩個都冇波入啩？
英超：利物浦vs米杜士堡
開賽時間：周六10:00pm
直播：now632台
車仔拔「根」報復
車路士領隊史高拉利就話上任後，要車仔贏得漂亮，果然第一場就炒樸茨茅夫4蛋；上季尾韋根作客迫和車仔，間接令車仔追唔到曼聯，呢次唔大報復就勢係假。對手韋根首仗不敵韋斯咸，雖然前鋒沙基表現唔錯，但今次應該好難唔兩連敗。
英超：韋根vs車路士
開賽時間：周日8:30pm
直播：now632台