𡃁界女神Angelababy昨日與鍾嘉欣和名模AnaR.等行騷，成為全場最的骰的模特兒，她直認努力運動增高，更笑言不介意做「哈比人」及想嫁給姚明，生個高大的下一代。
美國牛仔褲品牌7forAllMankind昨日在中環舉行08秋冬時裝騷，鍾嘉欣、Angelababy、AnaR.、翻版關之琳Jocelyn和王敏德女兒王曼喜齊齊行騷，眾人中以鍾嘉欣最高，五呎八吋的她，穿上四吋高跟鞋，比Angelababy高出半個頭，鍾嘉欣更獲品牌高層搭膊歡迎。
「我想增高」
Angelababy說：「我五呎五吋左右，今日淨係着咗兩吋高嘅鞋，可能我可愛look多啲。」𡃁界女神也是模特兒，問她可有因身高輸蝕而想增高？她說：「係呀，我想增高，有時都會做運動，好似游水、打籃球。」
外界有斷腳骨增高手術，問Angelababy可敢試？她說：「聽到都覺得恐怖，其實比例啱最緊要，惟有嫁個高啲嘅男仔，等下一代高啲啦。」Angelababy隨即笑說：「我要嫁姚明，我好鍾意佢！」站在七呎六吋姚明身邊，豈非變小矮人？她說：「唔係，係變哈比人，不過都冇乜可能，佢係NBA巨星。」
企直防博懵
鮮有參與品牌行騷的鍾嘉欣，即時大賣口乖說：「我好鍾意呢個品牌，以前成日叫人喺美國幫我買，喺加拿大時又會上網買。」問她被品牌高層搭膊頭，可覺突兀？她即說：「唔會，係禮儀啫，我仲同佢傾佢個女，都係喺加拿大讀書。」她透露過去曾有熱情fans想攬她，但被助手推開，更指自己的防博懵策略是做個正經人，她說：「我會企直個人，刻意同陌生人保持距離，畀人感覺我係好正經咁。不過識我嘅人，就會知我其實好熱情。」
採訪：RitaLeung
攝影：RickyIp
