正忙於籌備10月婚禮嘅陳慧琳（Kelly），婚前仲有大把嘢做，之前佢就為合作咗4年嘅珠寶公司，拍攝新廣告，呢次係佢告別單身之作，合作夥伴有Kelly老友記奚仲文同台灣導演林錦和，佢哋就專登喺呢輯廣告度，為Kelly度身訂做一個婚紗look。
「特別幸福」
廣告中，Kelly有多款仿婚禮造型，配上珠寶鑽飾，令Kelly十足一個幸褔新娘子，着住婚紗嘅Kelly話：「可能係接近自己嘅婚禮，感覺好似自己結婚咁，當提前預演。今次畀我佩戴嘅鑽飾真係好靚，連笑容都特別幸褔咁。」為咗保持神秘感，Kelly唔肯透露真正結婚當日會戴乜嘢首飾。
扮蝴蝶拍翼
除咗有婚紗造型，仲有一個係Kelly化身飛天蝴蝶，為咗拍攝飛動動作，又要展現高貴時尚女性，着咗一套淡藍色薄紗嘅Kelly，喺紗上綁住透明魚絲，跟住開動大風扇，要不停郁動雙手扮飛，足足拍咗兩個鐘，難得呢位準新娘一啲都冇嗌攰，因為拍出嚟嘅效果好靚，佢仲甜到漏話：「拍得咁靚，再攰啲都抵，好似未來有老公嘅愛同幸褔，我對自己信任嘅人付出，乜嘢都唔怕。」