白銀嘅價錢喺對上兩個禮拜大幅下跌，相信大家都知道。如果孫柏文問大家知唔知銀價點解會咁跌，相信大家一定會答：「任何一樣嘢嘅價錢郁，都只不過反映供求關係。價錢升，一係供應少咗，一係就需求多咗，價錢跌就掉番轉。」
如果你咁樣答，我就要繼續追問：「咁點解白銀嘅價錢大跌，不過全世界想買白銀嘅人，又因為白銀短缺而買唔到？」呢個就係個謎團。一樣嘢短缺，即係市價未能反映供求，市價只需要上升，短缺就會消失。
需求增紙銀價竟跌
不過早幾個月前，我已經開始聽到喺外國銀條、銀幣嘅供應出現問題，就連已經買咗嘅人，去到打銀幣嘅地方收貨，都會面對供應商好多藉口，攞唔到貨。不過就算有以上嘅情況，銀價都居然可以由19美元一盎斯，跌到12美元，買咗白銀嘅人個個都問：「究竟搞乜嘢呀？」
當一樣嘢嘅價錢下跌，不過又同時出現短缺，唯一嘅解釋，就係短缺嘅嘢同嗰一件有「市價」嘅嘢其實係唔同，唔係同一樣嘢。以「銀價」為例，嗰個不斷在跳動嘅數目字，就係反映喺倫敦、紐約商品交易所嘅價格，因為絕大部份嘅參與者，都唔會做交收，分分鐘連條銀條都未見過，所以嗰個「銀價」其實係「紙銀價」。
咁如果喺商品交易所買賣嘅「銀」係「紙銀」。嗰啲買銀條、銀幣嘅人又買緊乜？佢哋就係買實貨，買「實銀」。
穩定溢價不再
咁「實銀」出現短缺，價錢應該上升，咁有冇升先？我只可以話，以前「實銀價」比「紙銀價」有一個非常之穩定嘅溢價，去彌補運輸等成本，溢價大約1美元一盎斯左右。到上個禮拜五，「紙銀價」去到12美元時，有啲零售點嘅「實銀價」都維持喺16美元以上。
大家唔係蠢才，都知我哋將「紙銀」當成白銀嘅原因，就係因為可以向啲喺商品交易所嘅賣家攞「實銀」貨。現在「實銀」同「紙銀」有咁大分別時，應該有好多人會進行套戥，應該將「紙銀價」推高。不過一旦攞「實銀」貨呢個動作出現問題，商品交易所嘅「紙銀」就只會變成「紙」，原本想叫大家再買「實銀」，不過現在短缺。
http://phatdat.blogspot.com