郭秀雲和前夫錢小豪的兒子錢麒夫，前晚慶祝18歲生日，一對離異多年的父母罕有同場兼合照，同賀兒子成年。錢小豪給兒子的成年禮物，就是一段訓話，訓示兒子要自力更生，買車養家都要靠自己。
郭秀雲和前夫錢小豪所生的兒子錢麒夫，昨日18歲生日，前晚在中環dragon-i舉行成人禮派對，一班英國書友和朋友如賭王何鴻燊與四姨太梁安琪的女兒何超盈、寇鴻萍長女唐貝詩和王晶女兒王子涵等，齊齊慶祝。
小豪囑自力更生
有志加入娛樂圈的錢麒夫，現時已改名為錢景峰，前晚派對更用新名字印海報四處張貼。離婚多年的父母錢小豪和郭秀雲罕有同場，錢小豪帶了壽星仔的爺爺和嫲嫲，一家五口拍攝全家福，錢景峰說：「好多年冇試過囉！」問他18歲後，第一件事最想做甚麼？原來他和曾做賽車手的錢小豪一樣愛車，他說：「想考車牌，再買架車，我想揸法拉利，不過budget問題，應該買MiniCooper，用紅色同掛個Ferrari字車牌啦。」
錢小豪就講明不會送車，他說：「以前佢生日，通常會送遊戲機、玩具，今年唔送喇，佢18歲大個仔，我會對佢訓話。我嗰年18歲，都係自己買車同埋養家，我唔會sponsor佢。」他指兩父子感情不俗，他說：「每次佢返香港，都會搵我一齊游水、踩單車，不過好少一齊出席公眾活動，佢同六歲嘅細佬（錢小豪和丘倩鳴之子）都成日玩，好夾。」
對於兒子入娛樂圈，錢小豪說：「我唔反對，以學業為基本先，我、佢媽咪、叔叔都係呢行出身，我都同佢講過有壓力，叫佢要學多啲嘢增值，磨多張刀。」
離婚後再組家庭
郭秀雲則送了一套五隻熊仔造型的ABathingApe公仔給兒子，她透露兒子新名由蔡伯勵改，問她是否有利走紅娛樂圈？她說：「佢唔係入娛圈，當學嘢啫，個名係想佢讀書好啲。」
郭秀雲和錢小豪90年在澳洲秘密結婚，之後誕下兒子錢麒夫，但結婚不足三年分居，最終離婚收場。之後，兩人各自組成新家庭，郭秀雲與鋼鐵大王龐鼎元之子龐傑結婚，錢小豪則迎娶前藝員丘倩鳴，並育有一子，兩人分開後，極少同場碰頭。
採訪、攝影：LawWaiMan
