大鑊！講嘅係巴西喺奧運男足失利後，教練鄧加孭嗰隻鑊當然唔細，據講上至總統盧拉、下至球迷都想佢落台，之前嘅功勞一鋪清袋，真陰功。男足水皮，對比之下今晚9點爭女足金牌嘅巴西女足就威風得多，可以嘅話，怕且鄧加真係想有個瑪達畀佢調動，由「女細哨」代替「細哨」。
去年贏美洲盃風光
輸波事小，俾死敵阿根廷大敗就事大。巴西總統盧拉賽後怒轟：「我睇見一支毫無爭勝意欲嘅巴西隊！」有國會議員乘機抽水對盧拉講：「如果你炒到鄧加魷魚，我就撐你嘅議案。」政客鬧完，球迷當然唔會留手，喺巴西《蘭斯報》網上調查顯示，有17,330人（58.55%）認為鄧加要為出局負責。
自從鄧加06年執教巴西國家隊之後，舊年帶隊大勝阿根廷贏美洲國家盃，諗住乘勝兼任國奧隊出征奧運，幫國家摘男足首金，最終衰咗，咩衰嘢都俾人挖番嚟講，例如喺世界盃外圍賽表現差勁（6戰2勝3和1負），體驗咩叫人情冷暖。平心而論，我判官覺得巴西今屆備戰都好唔順利，卡卡、羅賓奴都踢唔到，如果鄧加兩大愛將在陣，就算入唔到決賽，都未至於輸得咁甘。
巴女足今晚爭金牌
講番巴西女足，除咗第一場和德國之外，巴西已經連贏4場兼攻入11球，上場再大炒德國4:1，真係堅過石堅；而今晚鬥美國正正係4年前雅典奧運女足決賽翻版，如今巴西氣勢、實力都比4年前強，復仇在望，有「女細哨」之稱嘅瑪達上屆淚灑球場嘅一幕，應該唔會重現啩？換轉我係鄧加，真係唔知應唔應該為女足隊打氣，一旦女足攞金牌，更加凸顯男足唔掂，變相俾人插多刀。