台灣《壹週刊》真係好嘢，八月十三日首先踢爆陳水扁太太（扁嫂）利用媳婦黃睿靚嘅戶口，秘密滙走三億元新台幣到美國。之後就係歷史咯，陳水扁承認有其事，宣佈夫婦退出民進黨，畀民進黨人痛批：「去死吧」。
陳水扁從政多年，特別係做咗總統八年，究竟貪咗幾多錢，無人數得清，今日卒之身敗名裂，遺臭台灣政治史。點解今日至爆煲呢？左丁山記起十幾年前，港督彭定康訪問報館，與老闆吃午飯，左丁山陪坐，與肥彭講起貪污問題與廉政公署，肥彭話：「廉署反貪好有功勞，但係要記住，反貪污嘅第一道防線係新聞自由（PressFreedom），貪官或者官商勾結，最怕見到自己嘅貪污與非法勾當出現在報紙頭版！」
如果某地區嘅報紙傳媒唔敢調查及報導高官以至總理嘅貪污事跡，當局可以冚得就冚，一切由得政治領導人話事，貪污就難以根絕咯，新加坡係一個例外之例外，新加坡亦因此向高官付出全世界最高嘅薪酬。
不過，睇奧運馬術，中場休息之時，碰到賓架L，講起台灣《壹週刊》踢爆陳水扁一家貪腐，賓架L冷笑一聲：「唓，又唔見台灣壹仔喺陳水扁住在總統府時踢爆？假若謝長廷選贏馬英九，民進黨總統揸弗，台灣《壹週刊》又敢唔敢報導此事呢？」呢個問題幾深層，難以代答，但係左丁山諗到另外一個答案，就係民主選舉與傳媒自由相輔相成，無選舉嘅地區新聞自由就受到鎮壓，以前台灣在黨禁、報禁時期，台灣啲報紙邊度會膽敢揭發國民黨官員嘅瘡疤呀？報紙大老闆兼任做國民黨中常委㖭！但自從黨禁、報禁解禁，台灣有咗民主選舉，政權可以交替之後，台灣媒體報導新聞之大膽，超乎香港人之想像，如邱吉爾講過，民主是一個壞制度，但沒有另外一個制度比民主更好！有民主選舉，選民就可以votetherascalsout（陳水扁就係rascal，佢連累民進黨成為rascals，結果被台灣選民voteout），正因為啲壞蛋離開，另一批人上場，傳媒就更可以更大膽，不怕壞蛋在政治上報復，一於篤爆佢！香港嘅新聞自由不是必然㗎，我哋仲要爭取民主直選！