北京奧運中國隊今屆大豐收，奪得金牌數目破紀錄，運動員揚威國際，係人民英雄，亦係香港人偶像，幾十個金牌運動員下星期五會嚟香港訪問三日，據知會表演舉重、跳水、體操、乒乓波同羽毛球等五個項目，畀個機會香港人現場欣賞佢哋多年苦練嘅成果。
呢個世界冇免費午餐，奧運甫結束金牌大軍就壓境殺到香港，咁趕係因為時間緊迫，仲有兩個幾星期就係立法會選舉投票日，呢班國寶級健兒喺投票日前一個星期現身香港，當然唔係巧合咁簡單啦，背後仲有政治含義，唔少人質疑係為民建聯、保皇黨造勢，中央試圖延續港人愛國熱情，目的係谷盡左派選情。
奉旨抽水有前科
四年前立法會選舉前，北京都有安排金牌運動員訪港，當年50萬人上街效應猶在，左派形勢緊急，老董管治岌岌可危，阿爺不惜出動體育精英為左派護盤，名為感謝香港市民支持，實際上係做政治宣傳工作，結果健兒不負所託，民建聯力保不失，如果唔係北京發功，左派仲唔俾市民掃地出門？
民建聯靠阿爺黐金糠都唔係冇前科，太空人楊利偉嚟香港喺大球場參加滙演，左派大派免費入場券攏絡選民收買人心，平時已經畀唔少旅行、蛇宴着數街坊，太空人嚟香港，又點會唔公然奉旨抽水？今次要睇金牌運動員表演，據知要買飛入場，至於左派，即係民建聯、工聯會有冇免費飛派，就暫時未知。北京出盡精英，唔止左派受惠，連煲呔都得益，中聯辦高幹早前已講到明，要求工商界維護特首管治權威，今次中央親自出手幫煲呔造勢，擺明係唔想佢民望繼續下跌，否則又要收拾殘局換特首就添煩添亂。
政府日夜宣傳，話選票唔係禮物券，唔可以用嚟換取利益，八方提醒各位選民，唔好因為有得睇金牌運動員就投票畀左派，要記住運動真係唔應該同政治扯上任何關係，運動員發揮最高水平超越自己係本份，淪為政治宣傳工具真係可悲。八方都相信香港人唔想攞咗金牌嘅運動員，不情不願成為左派助選團，如果係咁嘅話，辛辛苦苦鍛煉多年，捱生捱死日夜操練，攞到一面奧運金牌意義何在呢？
mailto:[email protected]