巴西喺奧運男足失利，最開心可能係曼聯領隊費格遜，話晒巴西只剩番一場意義唔慌大得去邊嘅季軍戰。基於卡域克、傑斯、夏格維斯都唔可以喺下個禮拜一對樸茨茅夫時落場，曼聯鬧中場荒，所以據報費Sir下令路爾斯安達臣即時返球會報到。但家陣巴西陣營愁雲慘霧，你叫安達臣點開口話離開國家隊陣營？費Sir唔應該強人所難啦。