奧運未完，停咗一輪的多個中央經濟同市場研究小組會議，已急不及待地一個接一個召開，市場亦開始傳出救市的消息。可靠人士指出，奧運曲終人散後，中央救市措施就會陸續出台，而對多個行業的限價政策亦會相繼放寬。
中港股市大跌後回升，而且升得好硬淨，由頭升到尾，但暫時仍只能以技術性反彈視之，中期跌勢到底與否，仍待觀察。內地A股反彈個勢較勁，滬深兩地指數都升超過7%，港股則只升得2.1%，但H指則有4.3%進賬。恒指收20931，升446點，成交大增到623億元；期指升勢更勁，收20868，升513點。
中資股全面回升，特別係內房股、金融股同資源股表現最為突出。博反彈，可揀最近宣佈靚靚業績嘅馬鞍山鋼鐵（323），短炒好有機會賺兩至三成。
本月初，馬鋼收4.91元，短短半個月就跌到3.14元，跌幅36%，幾嚇人！好在前日企穩後，噚日一支大陽燭抽上去，走勢上已形成早晨之星，仲升破下降軌，短期上升目標指向4.20元至4.50元水平。
產品價格料可企穩
08年（12月年結）上半年，馬鋼營業額370.4億元人民幣（下同），升79%；獲利22.6億元，大升104%，每股盈利33.46分，升94%，業績遠遠超過市場預期。
宣佈業績前，馬鋼股價已一路下跌，宣佈後跌勢仍不止，主要係公司主席話下半年經營壓力將明顯較上半年為大，理由係煤價續上升而鋼材市價則回落。
上半年業績大進，主要係產品售價平均上升43%，以及新廠投產後高附加值產品比重提升，都有助抵銷原料漲價影響，更令鋼鐵主業毛利率上升。
公司雖放聲氣話下半年表現會遜色，但因供應增長有限，產品價格不會大幅回落，盈利雖減，保守估計仍會超過15億元，令全年盈利達到37億元，每股盈利55分（折62港仙），明年可再上升到40億元，每股盈利65港仙。以目標價4.50元計，08年PE為7.2倍，09年PE為6.9倍，股價仲有上升空間。