中國奧運選手攞唔攞到金牌，舉國關心。不過，攞到獎牌嘅選手點用佢哋嘅獎金，呢個話題就關係到銀行、基金，財務策劃公司，皆因呢班金牌得主好似「跳水皇后」郭晶晶、羽毛球好手林丹，同揚威體操壇嘅楊威等，絕對係底子好、質素高兼有財力嘅客戶。
喺呢啲金融機構中，以建行（939）最快手，佢哋總行高端客戶部總經理程正紅對《理財週報》記者話，已經部署好搵呢班奧運冠軍，同埋佢哋嘅親人。
程正紅話，知道曾經有運動員因不擅理財，搞到要賣獎牌維生，所以建行一啲分行以前都有為國家體育運動隊、運動員做理財講座，而且好受歡迎。奧運期間，建行總行要求分行做好為奧運獎牌得主理財嘅工作。
據報道，中行（3988）、招行（3968）、東亞（023）、民生等私人銀行仲係密切關注緊咋。金牌選手始終有限，手快有手慢冇。