轆Book:長陣Freed 有埋購物袋?

轆Book:長陣Freed 有埋購物袋?

HondaJazz,即係水貨Fit仔,今日呢部Freed驟眼似足Fit仔,不過係拉長咗嗰隻。Freed係Honda全新車種,日系有五座、七座、八座選擇,香港引入嘅首部Freed係1.5公升七座版,車身拉長咗,內櫳大咗,最過癮係手枕位內藏手提袋,方便師奶買餸乎?

記者:梁美甜
攝影:譚盈傑
模特兒:Enrica

加長版添跑味

新鮮滾熱辣推介,Freed五月尾日本初登場,唔夠三個月已經到港。正面睇,新車外形似Fit仔,車頭同大大個鬼面罩最似,難怪試車當日好多熟男都睥睥貢,誤以為Fit仔出咗加長版;打側睇呢?又似平治車仔喎,大傾斜度嘅擋風玻璃同三角窗,令車身整體線條上揚一體化,外形唔笨拙老土,仲帶跑味㖭。
Freed配備1.5公升直四SOHCi-VTEC引擎,加埋CVT無段變速波箱,馬力輸出達118匹,絕對夠日常生活車出車入,買餸接仔女返學放學啱晒數,耗油表現出色,資料顯示每公升行到16.4公里,算係咁。

■後排坐兩個Enrica都無問題,大隻男唔該前面啦。

■最搞鬼係手枕位,揭開蓋,裏面有個獨立手提袋,唔通方便阿太隨手拎起去買餸?

■近乎水平嘅中控台,平到可以寫字做功課。

■液晶顯示儀錶板,簡單而清晰。

■七座位,夠大夠闊落。

■收起尾排,尾廂容積出色,放幾個行李篋都無難度。

低地台方便上落

新車軸距2,740mm,闊度增加,內櫳空間相對增加,Enrica同攝影師喺車廂轉嚟轉去,搞東搞西,化妝擺Pose都未試過頂頭撞膝。Enrica讚:「低地台,方便小朋友同老人家上落,電動趟門,開門閂門連力都慳番,我Buy。」三排七座位,望落闊落,坐落舒服,攝影師又讚:「中排兩張獨立座椅有手枕,坐都坐得Hea過人,坐兩件大隻猛男都OK。」輪到我,我覺得手枕位最有驚喜,揭開,裏面居然有個獨立手提袋,拎出嚟可以直接當購物袋用,唔通方便師奶買餸?不過咁,我份人比較貪心,Seat位雖然闊落,但要好似身中化骨綿掌攤屍咁攤咩,只限腳短人士,44吋長腿?上身焗住坐到直不甩先唔會頂膝頭囉。

a.1.5公升SOHCi-VTEC引擎,馬力唔弱耗油量低。

b.頭燈同鬼面罩,似唔似Fit?

c.同樣係揭背式,單看車尾又會被誤認係Fit仔。

d.半橢圓形尾燈,夠立體的骰。

e.頭燈設計簡約,死火燈同樣半橢圓形,前後設計統一。

f.新車輪胎只得14吋,好的骰。

HondaFreed七座規格

引擎:1,496cc,直四SOHCi-VTEC
馬力:118ps/6,600rpm
扭力:144Nm/4,800rpm
傳動:CVT無段變速,前置
車價:未定價
查詢:富利堡(28776700)