要講香港地道美食，車仔麵可以話最具代表性。既見證到因生活艱苦而衍生出嘅百搭文化，又可以眼見為準，邊樣賣相靚就叫邊樣，透明度夠高，靈活性高完全適合香港人。最近專賣海鮮嘅正斗記有新搞作，任客指指點點即叫即煮，十足十叫車仔麵一樣，百搭海鮮？又幾盞鬼喎！
記者：王震遠
攝影：王文忠
模特兒：Tracy@StageModels
海陸鮮蹤$268
上圖係自選版，呢個就係定食版「車仔海鮮」，花甲四隻、貴妃蚌一隻、帶子一隻、海蝦兩隻及蟶子皇一隻。師傅先將海中蝦開邊，再將翡翠苗泡腍，再放海鮮落鑊兜兩兜，就可以上碟。入口果然鮮味十足，無落太多調味；翡翠苗除原先爽甜之外，更加吸收晒全碟海鮮鮮味，必定要試試！
即揀即落鑊炒
出外食海鮮，好少可任你叫幾款炒埋一碟。食海鮮，重點係食鮮味，幾款生猛海鮮一齊炒，唔使用腦都想像得到有幾鮮啦。「正斗記」近日推出呢款「車仔麵式」海鮮食法，勝在自選，眼見邊隻生猛就即撈，口痕叫個帶子炒飯都絕對唔係用冷藏貨；而且可以一碟幾味，仲要係自選，實在幾考師傅心機同經驗，食客揀好材料，師傅就要開始剝殼起肉，再要盤算落鑊先後次序，呢種優質服務真係少見。有橋仲未成事，令「正斗記」擁有高質素海鮮供應呢個得天獨厚條件，全靠拍檔「德記號」，身兼魚類批發同零售，經營近40年在行內已經打出名堂，不少達官貴人都係「德記號」常客，有呢個強大backup，難怪成就「車仔海鮮」呢條絕橋。
靈感靠舊客
中環食客出名食得招積，叫碟菜都想有派頭。有次熟客到「正斗記」搞生日宴會，就請老闆Ricky推介一兩個菜式，原先想食亁燒伊麵，不過見生日，似乎唔夠吉利。Ricky出計改做活海鮮伊麵，出來效果果然大受歡迎；另一次，從事地產的生意熟客到「正斗記」慶祝，嘴刁刁指明叫Ricky發板揀不同海鮮來炒飯，結果價錢都過$200，但一樣大為受落。自此激發起Ricky新諗頭，催生出「車仔麵式」海鮮食法呢條絕橋。Ricky仲未收手，又再研究新煮意，遲些可能試玩西式沙律，拭目以待啦！
即燒乳豬$88例牌/$498隻
隻隻出自有廿幾年燒豬經驗嘅師傅，選用上等越南一級豬，全靠師傅心機掌握火候。豬皮脂肪夠厚身咬落去非常脆，肉質爽口唔會太油膩。
雲腿上湯翡翠白玉$56
用魚熬成嘅上湯浸熟雲腿同翡翠苗，再放竹笙同些少雲腿鋪面。全碟菜落少油夠健康，翡翠苗味道好清甜，加埋上湯入口味道濃郁，竹笙夠味又夠爽口。
菜膽燉翅$68
估唔到呢度都有機會食到菜膽燉翅，師傅先用菜膽加上湯燉好，大大梳翅足二両，菜夠肥美有咬口，味道亦相當清甜可口。
車仔海鮮點叫點計？
講番收費，基本上由A（海鮮材料）+B（烹調配料）組成，不喜歡連菜炒（B）可以另叫，悉隨尊便，以下例計算總消費$232。咁如果我想食碟帶子炒飯，又點計？二人用帶子皇4隻$72+烹調費$24+炒飯$48，即$144，轉伊麵亦係同價！
A.半斤花甲$28+4隻帶子皇（$18隻）$72+4両海大蝦$25=$125
B.百變豆（或翡翠苗）$58
C.海鮮烹調配料
半斤花甲$15+帶子皇（每隻$6）$24+半斤海大蝦$10=$49
Total：$232
正斗記（25452779）
中環士丹利街80號底層地下B室
