戴夢夢噚日帶埋師妹趙碩之到北角嘅交通安全城，着住交通安全隊制服嘅夢夢話做咗交通安全大使4年，今年膊頭加多粒花，升為副總隊監。不過身旁嘅趙碩之就話自己做咗15分鐘都有一粒花喎，咁講擺到明潤師姐啫！見到趙碩之滿面粒粒，佢話近排成日拍通宵戲，返屋企又懶，個妝卸一半就去瞓，所以搞成咁。
趙碩之話未抽到時間考車牌，𠵱家都係專心做乘客。講到交通意外，佢話最驚險係早排拍劇集《盛裝舞步愛作戰》，有晚收工佢同拍檔郭燕愉坐男性友人嘅車，點知有架派報紙嘅貨車撞埋右邊車身，好彩全部人都冇事。問佢當時驚唔驚？佢話唔驚，仲話覺得好得意喎。
夢夢亂泊車
夢夢就話做咗交通安全大使後，未試過有交通意外，最多都係趕時間亂泊車被抄牌，幾年前試過一次喺停車線，但佢心急冇停車，點知同拖頭車相撞，好彩個人冇事，但架車就報銷。