謝杏芳喺女單決賽輸咗俾隊友張寧，不過林丹就拎咗男單金牌，可以話係對呢一對準夫妻嘅最好禮物。紅透半邊天嘅林丹𠵱家忙住同謝杏芳籌備婚禮，據聞佢哋仲喺北京睇中咗間豪宅同靚車，睇嚟呢段發展4年嘅姊弟戀終於可以喺京奧後開花結果囉！
林丹同謝杏芳呢對「神鵰俠侶」雖然唔可以達成京奧前一齊贏金牌嘅承諾，亦都應驗咗魏仁芳、王蓮香之後冇羽毛球情侶球手一齊贏金牌嘅魔咒，不過佢哋都好坦然面對，林丹就好冧咁話：「喺決賽之前我一直喺度諗，贏到金牌梗係好事，但如果輸咗都可以同謝杏芳一齊有銀牌，我哋兩個都會好襯吖。」
先買靚車贈女友
最後林丹以狂風掃落葉姿態擊敗咗馬來西亞嘅李宗偉，達成自己嘅金牌心願之後，都係時候諗吓兩個人嘅人生大事啦。其實起初冇人會睇好呢段姊弟戀，不過林丹同謝杏芳兩個4年嚟打風都打唔甩，唔怪得謝杏芳爸爸忍唔住口對呢個未來女婿催婚咁話。
林丹都好識做，最近已經喺北京睇中咗間800萬人仔嘅豪宅，諗住喺首都築起兩個人嘅愛巢。提到新居嘅時候，林丹就話：「我哋理想中嘅屋企會有兩個廚房，一個中式一個西式，如果廚房同飯廳都有落地玻璃就仲正！」除此之外，林丹就計劃買架靚車送畀謝杏芳，獎勵佢喺京奧嘅表現。
放眼兩年後亞運
雖然𠵱家林丹事業同愛情兩得意，但係佢近年嘅勁敵陶菲克集奧運、世錦賽同埋亞運3大冠軍於一身，而林丹就係冇亞運金牌。由於亞洲嘅羽毛球壇幾乎可以等於世界水平，所以亞運金牌都係相當重要，林丹就話放眼兩年後嘅亞運，希望正式同陶菲克睇齊，之後要喺奧運冧莊過埋佢頭，真豪氣！