俄羅斯「女鳥人」伊仙芭耶娃（YelenaIsinbaeva）喺女子撐竿跳越跳越高，佢仲話有信心破多12次世界紀錄。咦，佢每破1次世績，贊助商就會畀佢5萬美元（約38萬港元），咁佢咪隨時有多60萬美元落袋，睇嚟佢真係會長破長有。
前晚伊仙芭耶娃喺女子撐竿跳以5米05破咗自己保持嘅世界紀錄後，前前後後24次刷新世績。佢成功衞冕奧運金牌後，將目標放喺4年後嘅倫敦奧運，仲話想喺短時間內跳過5米10，同埋打破「鳥人」布卡（SergeiBubka）35次刷新世界紀錄嘅偉大成就。
26歲嘅伊仙芭耶娃咁講：「我仲會破多紀錄12次或以上。人生唔破紀錄就會好沉悶，所以我不斷咁打破世界紀錄。我仲有進步空間，所以我會參加2012年倫敦奧運。」
每破世績即袋38萬
聽講伊仙芭耶娃每破1次世界紀錄，佢嘅贊助商會送出5萬美元獎金，如果佢真係破到布卡嘅紀錄，真係大賺一筆。但話時話，我判官知佢對錢唔係睇得咁重要，事關佢先排就捐咗50萬美元俾佢出生地伏爾加格勒，幫助當地有需要嘅兒童。雖則佢好有愛心，不過亦相當記仇。
我判官記得攞銀牌嘅史杜辛絲姬（JenniferStuczynski）早排講過，要喺京奧打到伊仙芭耶娃仙屁滾尿流，但最後輸成條街。佢咁話：「你哋見到啦！有人講得多咗，我喺度就證明咗自己嘅實力。講真佢咁講我真係好嬲，但我唔想同佢罵戰。經過呢場比賽後，佢應該乜都清楚晒，佢一定識得尊重我，同埋知道自己嘅位置。」
無記捉蟲播整餅劇
點到好，伊仙芭耶娃佢唔單止有實力，個樣又夠靚同成日笑容滿面，加上化行妝油埋指甲，仲間唔時送飛吻，所以睇佢玩撐竿跳，真係睇得好開心。
前晚場女子撐竿跳，好彩我判官夠醒目，喺三色台話停止直播，而播套鎮台整餅劇集後，立即轉咗過去絲帶台，如果唔係就見證唔到世界紀錄嘅誕生，無記呢次真係捉蟲。