昨日港股跌穿今年3月低位，市況持續不明朗，投資者信心亦不足；嘉賓認為港股跌勢彷彿未止，股海人心惶惶，惟提醒持有正股的投資者，現時亦不是沽貨時機，更相信大市只欠終極一跌，就有機會快速反彈。
沈：英皇證券研究部主管沈振盈
楊：主持楊慧玲
楊：噚晚（即前晚）美股跌近二百點，雖然見到今日（周二）A股方面開始有啲起色，但港股走勢竟然唔跟中國，反而變咗跟弱勢個邊行多啲喎。
沈：港股經過7月反彈之後都一直下跌，內地股市回穩港股唔跟，係因為港股比起內地股市跌慢咗，而美股早前亦已跌穿咗三月低位，所以港股仲跌係正常嘅；不過，𠵱家港股外表上好似跌勢未止，令投資者人心惶惶，同三月中嘅時候一樣，但𠵱家其實只係等最後一下殺倉式下跌；另外再加上內地股市企穩，港股就會有機會好快咁彈返上去，所以，如果揸緊正股嘅投資者，現市況絕對唔係沽貨嘅時間。
搶先貼股
吼22蚊買招行
Carmen：我想問吓招商銀行（3968），幾錢可以買入？
沈：我可以畀個短線吸納位你，不過都有機會輸㗎，但係當然如果策略長線就另計喇，而招行今日（周二）跌到去23.7蚊，睇嚟個市仲會跌多一兩日，所以應該等個市跌到好驚嘅時候，價位又去到22蚊左右先閃個頭出去買，止蝕位就去19.5蚊，上望25蚊左右。
收市後4:30pm
click入 http://finance.appledaily.com以webcam參與節目及收看
歡迎phonein28698262暢談心得亦可email至mailto:[email protected]搶先貼股