由1985年開始舉辦的亞洲小姐競選今年踏入第20屆，昨日舉行記者會宣佈開始接受報名，十多名曾獲獎的亞姐一同現身支持。其中大師姐黎燕珊除呼籲合資格的女士報名參賽外，更表示希望重組亞姐慈善組織「仁美清敍」，邀請歷屆亞姐如利智和葉玉卿等助陣。
亞視昨日於美麗華酒店舉行亞洲小姐記者會，宣佈第20屆競選開始接受報名，又請得14位歷屆亞姐出席支持，其中包括黎燕珊、朱慧珊、呂晶晶和萬綺雯等。各人均悉心打扮出席，又在台上呼籲合資格的女士參賽。
萬綺雯願當跑腿
亞姐首屆冠軍的大師姐黎燕珊，提到希望重組已停辦的亞姐慈善組織「仁美清敍」，問到可會邀請利智和葉玉卿等人加入時，她說：「我會親自聯絡啲師妹，冇乜話邊個會搵唔到，不過一定要先尊重人哋嘅立場先囉，最緊要就係將我哋嘅誠意擺咗出嚟先，但係始終有部份人都已經退隱咗好耐喇。」
朱慧珊則認為除歷屆佳麗外，也應與亞視一同合作，她說：「其實都有同公司傾過，但係呢排大家都忙住做奧運，遲啲會再傾吓，因為重組唔係幾個人嘅事咁簡單，希望公司都可以支援吓啦。」
同場的萬綺雯則笑說自己可當跑腿一職，她笑說：「幹事就唔使喇，跑腿好啲，我平時同媽咪都係去做義工周圍走㗎啦，我出勞力就得㗎喇。」
邀內地朋友參選
至於全場最性感的呂晶晶就提到會邀請內地朋友參選，與一眾師姐同場的她又表示：「喺我心目中印象最深刻係萬綺雯同楊恭如，因為以前有睇《我同殭屍有個約會》，楊恭如個樣好似Mix。」
採訪、攝影：藍文浩
