自從國民黨喺台灣重新上台，唔少大陸企業家都飛去台灣搵投資機會，早排就有百度李彥宏，今次就係SOHO中國（410）主席潘石屹。佢喺台北同台灣名嘴李敖出席對談活動，仲將京奧祥雲火炬紀念品當手信送畀李敖。
潘石屹同台灣名嘴李敖對談，當中梗有唔少精警對答，李敖大讚潘石屹係鄧小平倡導下脫貧嘅樣辦，「一個從全中國最貧窮省分（甘肅）之一出來，取得現有的成功，你是實踐檢驗真理的榜樣，改革開放的成功範例。」李敖仲話：「我的財產是你零頭的百分之一，但你和蓋茨比起來也差很遠，成功不能用財富的多少衡量，你的成長過程讓我很感動。」
台灣對成長有神奇力量
俾李敖咁讚法，潘石屹當然禮貌回敬幾句，又話有睇過李敖嘅著作，「我是向台灣郵購書籍比較多的大陸人，曾經郵購過所有李敖、柏楊、南懷瑾的書，可以說台灣對我的成長有很神奇的力量。」今次對談會，睇落似互捧大會多啲。