油價高企，航空公司叫苦連天，絞盡腦汁度橋慳成本。有航空公司拆晒每個座位前嘅迷你電視，亦有將乘客當行李咁上磅，超磅嘅重量級乘客要額外收費。華華有個老友，之前去日本，因為加埋機票嘅燃油費太貴，所以貪平搭東方航空（670），輾轉經上海去日本，搭完返嚟同華華講，東航嘅慳成本方法，認真妙！
話說班機升到上萬呎高空，老友覺得機艙越嚟越「溫暖」，跟住就有乘客向空姐投訴，問係咪空調有問題，抑或唔覺意閂咗？點知個空姐話問過機師，但機師冇回覆點解。咁友人同一眾乘客就估，應該係有關方面校細咗個空調，響應節能啩。
雖則話奧運要搞綠色環保啫，唔使喺萬呎高空先閂冷氣吓嘩，又開唔到窗吹風。所以又再有乘客投訴，如果你係空姐會點做呢？東航空姐就請乘客食冰淇淋，咪心邪，唔係對眼食嘅，而係食落肚嘅雀巢雪糕。
一桶雪糕點都平過一桶油，咁都諗到，唔知係咪東航董事長李豐華嘅好橋。