京奧重頭戲，當然係劉翔嘅百一米跨欄，原來經濟學家張五常亦係劉翔粉絲，期待呢場矚目盛事。佢喺個blog度話：「心跳、心跳，到那天我可能喝醉了！」仲形容「北京奧運劉翔大戰古巴仔（羅布斯）是百年難得一遇的賽事，世紀之賽無疑。」佢力撐劉翔即使年齡大過古巴仔3年，亦唔使擔心，因為劉翔仍然喺頂峯期。
中國人為感恩捧場
不過，張五常寫嘢當然離唔開佢嘅老本行──數字，佢話呢次比賽勝負，仲影響到劉翔個人廣告收入。以成世人計，贏同輸起碼相差10億銀人仔。根據張五常分析，劉翔勝出，中國人喺「感恩之下」，會多買佢賣廣告嘅產品，以13億人口計算，每人願意畀1蚊，就有13億銀。如果每人100蚊，就係1300億，廣告商會因為咁瘋狂出價，爭取劉翔做廣告代言人。
咁如果劉翔輸咗又點？張五常話：「禁說，我沒有興趣想到他輸的那邊去。」