轆Book：針有兩頭利　海堂帶頭辣跑從良

唔明點解成日整路，但路面仲係凹凹凸凸？喺香港揸辣跑要付出幾大代價，除冒甩肺危機外，載屋企人仲周不時被哦：「喂，扽死人咩？」甩尾王海堂今次導各辣跑車主回頭是岸，親自測試RS新一代避震機再推畀辣車迷：「真係軟硬適中，辣又得唔辣又得。」嘩，乜咁蔡瀾口吻……

文：嘴嚼爺
攝：陳陶鈞

甩尾王唔甩肺

阿海堂，到底條避震係你出嘅，定間車房有你份？「無呀，無收錢㗎。」話說上星期喺珠海睇橫滑會MSC飄移比賽，海堂贏完比賽同佢吹開水，佢話要造福人群積陰德，所以有好嘢同大家Share──有32段軟硬調校嘅RS第二代Damperkit。「呢套避震好啱喺香港行，唔會太硬，行凹凸路面唔會震到甩肺，但又保持到跑車性能，劈彎唔會啷嚟啷去，我成隊車隊嘅行街車、拍戲用做賽車特技嘅拍攝車都裝咗。不過講到玩甩尾，就梗係唔得，玩甩尾真係要好硬嘅避震先得。」
講技術性問題，呢套避震用咗超輕量鋁合金造單筒，彈弓則用上疏密圈設計，頭段較軟，可以加強舒適性，而彈弓尾段則較硬淨，令劈彎時有足夠托承能力，雖然我唔想幫佢賣廣告，但$5,900包料包工仲包半年保養又確係抵。

■飆快啲，行車一樣夠穩定。

■未換避震前，建議咪揸WRX載老人家，骨頭脆呀。

■我試過原裝新車，又試過呢部換咗避震嘅，感覺真係好唔同。

保留辣味啱啱好

齋聽佢講唔夠，影相當日仲有SubaruWRX車主阿華自動獻身，俾架車海堂劈番轉，兼俾我體驗吓。阿華係典型家庭男人，「屋企人成日坐我部車，我又有老婆又有小朋友，最弊我又鍾意得閒揸WRX爽吓，又覺得架車唔Low低避震唔夠靚仔，都係有個又係揸WRX嘅Friend介紹呢套嘢畀我。」裝完有乜結論？「日常載屋企人，佢哋詐少咗型，真係唔太扽，開頭都驚將部跑車變咗房車㗎，有時揸快啲都無篩嚟篩去，啱啱好囉。」由荃灣車房出發，一出門口段路凹凸過劉翔塊面，梗係無房車咁舒服，但又真係估唔到一架WRX嘅懸掛會咁房車化，之後沿路入深井，海堂都算劈住去，入彎入迴旋處都真係感受到良好貼地感。講番套避震，澳洲品牌，不過本地代理就自己研究更多版本，當然唔只WRX車主裝得，基本上大熱車款如EVO、Golf，GTR33、34都裝得。