馬會喺八月十四日招待傳媒高層及專欄作家睇馬術，包廂內幾乎睇見晒全港老總、社長及知名作家，十分熱鬧。呢晚係盛裝舞步賽之團體賽決戰，荷蘭大戰德國，畢竟德國係老牌騎術大國，三位女將表現出眾，頭號選手IsabellWerth尤其出色，三人平均得分72.916，力壓荷蘭隊（二女一男）嘅71.75分，繼三項賽團體賽，三項賽個人賽兩面金牌之後，奪得第三項金牌。馬會總裁應家柏係德國人，見德國隊揚威，自然笑到見牙唔見眼。是晚頒獎嘉賓係約旦公主，特別貴賓係前國際奧林匹克委員會主席薩馬蘭奇侯爵，包廂內名人還有陳方安生、利子厚、黃志祥、李麗娟等等。據講雅虎創辦人楊致遠亦在場內，但左丁山無緣遇上。
西班牙人薩馬蘭奇原來個子不高，此晚穿上白色西裝，八十八歲咯，仍然精神奕奕，外形十分搶眼。當初以為佢係國家貴賓，與胡錦濤平起平坐，行動會與別不同；見到真人，先知道佢冇乜架子。薩馬蘭奇坐在馬會主席陳祖澤旁，與馬會董事利子厚（亦係本港場地障礙賽好手）傾馬術，後來答應畀記者拍照。但包廂內冇記者矣，點影相呢？唔使怕，一班老總原來好專業，一知道有相影，立即拿出相機（以普通機仔為多），明報老總Ｃ最厲害，袋內竟然藏有「炮仔相機」，成個專業攝影記者咁款，拍個不停。薩馬蘭奇見慣鏡頭，再與專欄作家拍大合照，食評專家Ｌ唔執輸，請薩馬蘭奇與佢合照，薩老亦來者不拒，真不愧為走慣碼頭之公關老手，薩老做咗二十一年（1980-2001）國際奧委會主席，果然有佢一套。
是晚參加團體賽之盛裝舞步賽嘅選手，全係世界一流高手，荷蘭代表之一AnkyvanGrunsven女士係二○○四年荷蘭盛裝舞步賽金牌得主，可惜佢嘅隊友表現稍遜，取得團體賽銀牌係合理賽果；第三名之丹麥得68.875分，與金銀牌相距甚遠，但已係丹麥馬術史上第一次得到奧運獎牌，在場丹麥國民舉起國旗歡呼。今晚（19號）係盛裝舞步大賽個人賽決賽，馬匹配上自選音樂，自選動作，勢必精彩！Isabell與上屆金牌得主Anky（荷蘭女將）勢必殺到難分難解。