賭王何鴻燊有份嘅香港快運航空又有高層變動！繼前總裁蔡茂生今年7月起身，賭王外甥兼股東之一嘅謝天賜最近都走埋，佢已經辭去行政總裁職務，聽講，接替佢嘅係立法會候任議員石禮謙哥哥石嘉利。
其實，海南航空兩年前入主咗香港快運之後，謝天賜喺公司嘅發展空間已經有限。今年5月，佢高調入稟高等法院，向香港快運追討1764萬元，雙方關係有幾好真係唔使講都明啦，拜拜只係遲早嘅事。不過，佢𠵱家仍然係香港快運嘅股東，揸住十幾個巴仙，角色幾奇怪。
石嘉利爭輸直升機坪
接替謝天賜嘅石嘉利並非等閒之輩，佢好多年前係民航局（當年叫做局）做過，之後去過機場管理局做機場非禁區運作總經理，機場開幕佢都有份參與，但已經離開一段時間。
近年有關石嘉利嘅消息就係06年，佢同前立法會議員兼名嘴鄭經翰合作，同賭王爭信德頂層直升機坪擴建工程，最後梗係輸畀賭王啦，轉個頭，石嘉利就幫賭王間香港快運打工，所以話，呢個世界冇永遠嘅敵人。
不過，燃油成本高企，經濟又好似唔係咁好，航空公司𠵱家做生意真係唔容易，就連國泰航空（293）上半年都要蝕6.63億元，要扭盡六壬將航線調嚟調去做多啲生意。可想而知，石嘉利今次真係身負重任。聽講，香港快運未來有計劃配合旅行社開多啲新航線，希望增加收入來源咁話。
電郵：mailto:[email protected]