欄王劉翔因傷退陣，平保之前送畀佢嘅過億元意外保險唔知包唔包。其實奧運舉行期間，每日場內場外發生唔少意外，作為京奧合作夥伴，中國財險（2328）阿媽人保，由7月20號為奧運準備開始，到呢個月16號，已經接到超過1000宗同奧運有關嘅申報。
接逾千宗申報
財險攞到京奧呢單大刁，就要為京奧嘅工作人員同志願人士，仲有服務車同場館提供保障，火炬傳遞服務都係佢哋承保範圍。據《證券時報》報道，人保副總裁兼財險監事會主席丁運洲喺北京國際新聞中心記者會上話，集團接到嘅千幾宗保險申報，九成以上都係「小嘢」，好似刮傷、中暑等，一般喺現場即時簡單處理到，touchwood講句，暫時冇接到重大事故嘅申報。不過，買咗財險股票嘅投資者就冇咁樂觀，財險噚日收報4.03蚊，跌咗4%。
佢仲話，以前奧運嘅醫療保險都由舉辦國嘅政府或者社保機構提供，今次京奧用市場化手段，搵合作夥伴提供服務，係奧運保險史上嘅創舉。