馬來西亞歌手光良嘅巡迴演唱會，尾站已訂好11月15日喺台北小巨蛋舉行，仲改咗名做「光良第一次台北演唱會」，佢噚日邀請咗黎明嚟台北撐場，佢哋兩個一見面就熊抱，老友鬼鬼。
黎明喺會上特登頒咗支旗畀光良，祝佢演唱會成功，佢哋仲將旗插喺小巨蛋嘅模型上，代表光良嘅演唱會可以傲視同群，旗開得勝。
黎明呢次咁畀面即日來回港台兩地撐場，全因佢好鬼欣賞光良之故，佢提到有一次同工作人員去唱K，聽過光良嘅《第一次》後，大讚好聽，之後佢每次去卡拉OK都要點嚟唱，黎明仲用普通話話：「光良是我的好朋友，得知他要開演唱會，不只精神上要支持他，肉體上也要百分之百的支持，所以特地從香港飛到台灣替他加油打氣。」
提阿扁火滾
識英雄重英雄嘅光良都好感謝黎明，佢哋因為《第一次》呢首歌結緣，其後因為李宗盛介紹認識，光良又話：「我的第一場演唱會在香港紅館，門票開賣六天賣完，那時黎明跟我說：『光良，我們成功了！』這句話讓我非常的感動，而且我的第一場演唱會有黎明助陣，所以08年壓軸演出，一定也要邀請黎明來分享我的喜悅。」
此外，對於台灣前總統陳水扁海外洗錢案曝光，每年喺台灣交稅約25萬港元嘅光良，同普羅大眾一樣好震怒，佢噚日話：「很生氣，我有台灣居留證，除繳稅外，被開罰單也要交罰金。」光良也認為陳水扁洗錢金額，應該比目前調查嘅仲多。」
此外，活動主持黃子佼追問黎明同女友樂基兒嘅結婚傳聞，黎明大耍太極：「我來台灣的目的只有光良、小巨蛋。」