喺九龍東為民建聯團隊領軍嘅陳鑑林早因為力撐梁展文捱轟，近日風頭火勢一直潛水，避免成為眾矢之的，噚日又缺席由「香港人網」舉行嘅論壇，令到在場嘅唯一建制派代表、工聯會陳婉嫻成為其他四張泛民名單嘅圍攻對象。被迫要以一敵四應付所有矛頭，嫻姐呢鋪真係多得陳鑑林唔少。
雖然嫻姐早已講過，唔認同陳鑑林喺梁展文事件嘅言論，但未能避開泛民對手群起追擊。喺普選問題上，嫻姐一邊話支持全面直選，但又話唔贊成盡早廢除功能組別喎。真正普選冇可能包括功能團體選舉，但嫻姐有本事笑笑口講到兩者完全冇衝突咁，功力的確高過是但噏嘅陳鑑林好多。