約黃浩然試車，佢要試寶馬X6，靚仔揸靚車，媾晒香港啲女啦，作為其貌不揚兼長期糧尾嘅男人，我認我妒忌。事實佢真係想買X6，貪有個大尾箱方便做Stylist嘅老婆大篋小篋揸車開工，「𠵱家我坐我老婆車仲多過自己揸車。」我隔籬嗰件聽到雙眼發光咁話：「你睇吓人哋！你睇吓人哋！」算罷啦，人同車都係一樣，靚仔大晒。
文：嘴嚼爺
攝影：伍慶泉
先講明，黃生老早諗過買X6，「其實我一早試過車，外形真係贏晒，不過Sales同我講話起碼仲有200架先輪到我，下年年中先有車攞。」今次再遇X6，依然要讚：「個款四驅得嚟似房跑，車尾殺晒，感覺豪華。性能點？聽吓啲聲，TwinTurbo真係幾正！300匹（正確306匹）加埋6前速加減波，仲唔夠玩？」佢鍾意車，但比較少揸車，「揸車開工咪又係泊公司，橫掂都係跟廠車出外景，唔通自己揸車，去到目的地同人講：『你哋全部人等我十分鐘，我去泊車。』所以我老婆用車比較多。」
無換車癮
咁如果唔係俾老婆揸，會買乜車呢？「我鍾意古董車多啲，想買架舊款Mini，幾靚㗎，坐落又估唔到個櫳都唔算太細，Classic車款可以興幾廿年。」同佢喺劇入面揸開篷跑車個花花公子形象好唔同，「之後啲劇唔會淨係做媾女王㗎喇……」無試過揸車媾女？「我結咗婚先買第一部車，唔揸車都媾到女先勁吖嘛。講笑啫，嗰陣有錢都諗過買車，不過阿媽叫我買樓好過，我聽佢話，𠵱家層樓買咗十年，升咗兩倍。如果買車，𠵱家賣出去兩成都收唔番。我份人比較實際，唔係鍾意成日換車嘅人。」
甩轆陰影
33歲，結婚差唔多三年，黃浩然原來咁鬼踏實，揸車都係，「我真係唔會揸快車，」唔係講笑，佢試X6一轉，試加速試加減波，的確揸得唔快，「因為幾年前賴過嘢，仲要唔係自己揸嗰下先慘！嗰次幫電視台拍嘢，試架AstonMartinDB，試完拍完㗎喇，個Sales回程返車行時繼續Sell我，同我講：『呢個掣乜乜乜……』我都未暗叫完PK，已經撞咗，個轆都飛埋出嚟，我仲整親條脊骨。」又靚仔又肯就老婆，係咪咁好仔呀？啱啱俾女友詐型嘅我，好懷疑，點知呢個時候靚仔編輯搭嗲：「堅㗎，我撞過佢幾次搭地鐵去將軍澳，應該返TVB，佢見到啲師奶望住佢，佢都會同人微笑打招呼。」真係中國對夢八，邊夠你玩吖。
寶馬X63.0
引擎：2,979cc，直6DOHC配TwinTurbo
馬力：306hp/5,800-6,250rpm
扭力：400Nm/1,300-5,000rpm
傳動：6前速Steptronic半自動波，四輪驅動
車價：$798,000
車輛提供：BMWHK（27145271）