本地C組經紀上月成交市場份額再創新低，年逾91歲嘅勝利證券董事長高德泰同華華講，公司開檔超過35年，始終有班忠實客仔支持，舊年高峯期每日成交超過10億銀，經紀分12個月花紅，家陣大市成交雖然萎縮，但佢呢間行仍然維持到3億至4億銀成交，算唔錯咯！
好耐冇玩即日鮮
高德泰因為持有經紀牌，所以獲派80萬股港交所（388），不過佢話舊年恒指兩萬九千點時已賣剩唔夠10萬股，雖則話係分段減持，但華華估起碼賺幾千萬，高翁笑而不答，問佢仲揸住啲乜嘢股，佢就話係「商業秘密」喎！
雖然年紀大雙腳唔多聽話，但高翁風雨不改由青衣屋企去尖沙嘴嘅分公司，每朝9點鐘就昅住個市，雖然係咁，但佢話好耐冇落場玩即日鮮。高翁見慣風浪，華華問佢點睇大市，港股幾時見底反彈？高翁話要問神仙。
咁請教長壽秘訣講得喇啩。佢話自己生活刻板，冇飲酒廿幾年，平時冇食煙，唔打麻雀，亦冇諗過幾時退休，總之每朝6點起身，夜晚11點瞓，早餐一碗麥皮，正餐只食魚唔食肉，早晚飲杯加拿大花旗參茶清熱，燕窩就好少食，因覺得冇乜效，每星期按摩兩次鬆吓筋骨，咁就延年益壽。