白鴿黨九西候選人涂謹申一向重視人權，估唔到如廁權佢都唔忽視。噚日阿涂喺港台舉辦嘅九龍西選舉論壇中，成功為其他候選人爭取到廁所位；喺主持人講解辯論規則後，佢第一時間發問：「我哋大約幾時會去到洗手間？」唔好以為呢條問題好無謂，事關阿涂問完之後，真係有女候選人問係咪可以去廁所，結果大會放咗三分鐘廁所時間，候選人唔使苦練「忍」功都要多謝阿涂。
日前葉劉出席港台論壇時投訴冇水飲好可憐，港台從善如流，噚日終於派水畀候選人，專程帶住幾支水入場嘅民建聯李慧琼團隊唔知會唔會呻笨？柳玉成嘅普通話普通人未必聽得明，主持人謝志峰幾度話「我聽唔到你講嘢」，相信都係發自內心，唔係搞針對。