港股上周表現同外圍脫節，外圍升，港股跌，恒指再測試21000大關支持，收市雖能守穩其上，但已險象環生，市場淡勢仍盛，唔排除21000關最終會失守，至於淡友會「發功」到幾時？市場散播嘅消息，20000點係保守估計，18000點將係終極一跌嘅目標。淡友心願能否得償，要等事實證明。
大價股被淡友作為「開刀」對象，但個別跌得過份嘅股份，包括大中細股在內，則似有見底回升之勢，上周五大市個勢雖然咁差，但上升正股仍超過360隻，特別係有消息嘅三四線股，表現尤為突出，呢類股仔，有唔少跌幅達7至9成，只要公司冇事，一出現技術性反彈，由低位起計，升番兩三個開，亦好正常。
除股仔外，唔少大價股亦好抵買，就以中煤能源（1898）為例，7月上半月彈完之後，又再跟市勢回落，結果跌到12元水平才反彈，上周尾段連升兩日，走勢已見轉穩，上周五收12.48元，逆市而升，由去年10月中高位起計，跌幅高達58%，若非有限價同資源稅嘅政策風險，點會「大平賣」。
致力提高煤炭產量
煤價大升，中煤上半年盤數好靚，營業額264億元人民幣（下同），升58%；獲利42.18億元，升59.3%，每股盈利0.32元，不派中期息。期內，持有中國遠洋（1919）A股市值下跌9.164億元，若不計此數，盈利應為51.35億元，升127%，每股盈利0.39元。
中煤係以合約供煤為主，佔營業額達75%，限價影響不大。上半年煤炭銷售價格平均每噸455元，升114元，升幅33.6%，其中合同協約價為363元，現貨價596元，相差甚大，預期中煤在議定明年的合約煤價時，將會有頗大上升空間。
集團致力提高煤炭產量，達致全年產量和貿易量雙雙過億噸目標，下半年收益可再進一步，估計全年盈利100億元，每股盈利0.77元，09年可再上升到1.20元，以PE15倍計，股價已可重上18元水平。中煤現時手頭上有淨現金290億元，相信收購和注資進度會加快，對股價有刺激。
大行多看好中煤前景，近期的研究報告，以大摩同瑞信的較樂觀，目標分別為21.70元及22元，可作參考。