由彭鍵基法官做主席嘅離職公務員就業申請諮詢委員會，批准梁展文加入新世界受盡千夫所指，八方聽聞唔少政務官近日都對佢表現有微言，唔少AO一講起彭官就勁多怨言。
彭官身兼多職，亦係選舉管理委員會主席，為令下月立法會選舉順利舉行，選管會為擔任選舉主任嘅一班資深政務官，安排簡報會講解有關選舉嘅條例、指引，由於條文眾多，成班人聽完一輪講解後都幾多疑問，點知主持嘅職員竟然好多都答唔出，或者唔肯畀確實答案。
有官員透露，有時接獲候選人查詢，轉介至選管會方面，點知職員叫候選人自行諮詢法律意見，該官員指彭官手下人人A字膊，真係令選舉主任十分難做。