「優」和「伶」都是演員的意思，而不眠就係成日唔願瞓，兩個概念融和之後，就炮製成由新鮮出爐舞台劇女主角彭秀慧夥拍好姊妹「烈女」茜利妹嘅最新話題talkshow《不眠優伶》。繼《瘋女社》一拍即合之後，這兩個優伶再度發功，以香港人唔願瞓的生活習慣做題，由MSN傾到叮叮燒賣講到國歌再到對面窗口偷窺昅嘢，爆盡不眠gag，令入場觀眾包括我都有得笑冇得瞓，就算眼瞓都被逼笑番起身。
記者：蒙為亮
攝影：王文忠
四點幾扮抹窗昅嘢
沒有過份華麗的舞台裝飾或效果，沒有排山倒海式宣傳，但是在沙田大會堂文娛廳演出的《不眠優伶》，約300個座位一樣座無虛席，約三小時的talkshow，一個intermission都沒有，能做到全場笑聲此起彼落，就要每個gag位都計到準，莫非真係兩位不眠不休的度出來?整個talkshow的主題都是由兩個夜晚唔願瞓、朝早又唔願起身嘅女人仔出發，探討香港人的不眠文化，以及用不眠的角度去觀察身邊的人和事。引人笑，最好先笑自己，彭秀慧就有一段講述自己失戀同失眠的切身感受：「熱戀中的男女在床上多嘢做，不眠；未收到男友報到電話，失眠；因為多疑，失眠；到失戀傷心欲絕，又失眠──大抵成個戀愛過程，關係無論係好係壞，都會令你不眠和失眠。」女孩子一定試過一定有共鳴。
而茜利妹則有一段「黃色」的不眠奇遇。一晚，茜利妹照例瞓唔着，八卦望出窗外，發現有對情侶正做愛，過了一會情侶突然發現茜利妹在偷窺他們的房事，竟出乎意料地向茜利妹揮手，令以烈女見稱的茜利妹都頓時哭笑不得，惟有在半夜四點幾扮抹窗！
睡死人roadshow
Talkshow中大部份的topic都是圍繞日常生活發生，除非閣下是出入坐寶馬波子，從不搭港鐵巴士；除非你只食fourseasons，從不食出前一丁；又除非你只看CNN，不玩MSN，否則，大把gag位都會令你狂笑。「試問有邊個未試過三更半夜覺肚餓，打開雪櫃叮點心拼盤，叮完三分鐘發現隻珍珠雞唔夠熱，再叮三分鐘之後，兩粒燒賣縮到粒青豆咁細，想食又食唔到，勁失落!」「又試問有邊個未試過朝早八點幾鐘搭巴士101、108、111等過紅隧，全車鴉雀無聲，大家都爭分奪秒睡個你死我活，螢幕上嘅roadshow真係theshowmustgoon，無人睇都照播，彷彿做畀一班正牌睡死人看的「神功戲」。
「起來！」
另一全場歡呼的部份是，茜利妹和彭秀慧用身體做出多種動作表達MSN的卡通icon，搞笑又諷刺，寸盡MSN文化的空洞沒內容。其中一幕茜利妹和彭秀慧在網上MSN開chat，send了差不多五分鐘message，大家都唔知大家講啲咩，純粹為消磨時間而消磨時間。Talkshow不能缺少抵死幽默的對白，精采例子有「想瞓一定唔可以聽中國國歌，因為第一句就會叫你：『起來！不願做奴隸的人們……』」草根式的幽默感，再加兩人落力的演出，賺得不少掌聲。觀眾識得笑，因為有共鳴，因為我們都是這樣過日子，這也算是我們集體回憶的一部份。
「才女」VS「烈女」
一個「才女」一個「烈女」，究竟彭秀慧與茜利妹是如何「搭上」？
Kearen（彭秀慧）話全因為大家同是天涯不眠人，都愛搞東搞西搞到唔願瞓。兩人初次見面由音樂監製方樹樑做「媒人」，造就了這個烈女才女配，繼而開創香港首個創作女子組合talkshow，不過Kearen坦言talkshow界「創先河」三個字，給了自己很大壓力，「畢竟人哋對我哋今次個show都有一定期望，每個期望都是壓力來源。」Kearen認為茜利妹同佢不論思考模式、創作類型以及成長過程，雖不至於南轅北轍，但都有一定程度的不同，大家對同一件事會有不同觀點和睇法。茜利妹也說：「今次talkshow中有一部份是和觀眾玩game，我自己係DJ出身，較注重搞gag搞氣氛；Kearen是個正宗舞台人，較注重表情和動作神態的表達，初初大家都有少許唔習慣，不過夾吓夾吓又唔知點解做得到……」才女和烈女的這些「不同」最後卻為她倆帶來驚喜和火花。
夜麻麻塗指甲
既然以「不眠」為題開show，究竟兩人又有幾夜瞓/幾「早」瞓？原來Kearen每晚三點多就撐不住睡覺，除非要工作趕通宵，否則也不會令自己太辛苦，因為Kearen話自己好貪靚，「始終都要keep住個靚樣最緊要」。
反而她又大爆茜利妹唔到天光都唔瞓，一返到屋企發覺自己有好多嘢未做，未覆e-mail，未打稿，未睇雜誌，甚至未塗指甲油等等，總之未到天光，未有signal要瞓！
冇得瞓大覺瞓
得閒就不眠，一忙反而想瞓都冇得瞓，這個，Kearen和茜利妹感受至深。在度橋期間才女和烈女各有各忙，每次都要導演鄧偉傑嚴刑逼稿。逼得緊了，兩人竟然互相掩護，各自為對方砌詞狡辯，為把deadline拖遲幾日。但交稿大限將至，兩人惟有租咗間酒店房度橋寫稿，點知兩人因太耐無瞓，一見到張大床，即刻受唔住誘惑瞓着咗，結果成晚一隻字都冇打過。
Show後有感
小龍@W創作社
「彭秀慧和茜利妹都好有壓台感和親切感。搭巴士一段，取笑大家在巴士上千奇百怪的睡姿，有的如死屍攤在扶手上，演繹傳神，十分抵死。」
有耳非文
「絕對是誠意之作，每個笑位都計算準確，尤其是茜利妹偷窺對面屋一幕最好笑。」
嘉偉
「最好笑係茜利妹嘅港鐵gag，佢一上車就挨住玻璃瞓，瞓瞓吓覺得有陣怪味，原來係上手留下的口水漬！」
Harry+Vivian
「十分滿分我哋畀八分，這個組合好有驚喜，最搞笑係佢哋有一幕扮麻甩男人公仔，好神似。」
