呢排晚晚陪我七歲嘅姨甥女喺屋企睇奧運，不過，一定將電視校到「靜音」，唔想聽班無謂主持講無謂嘢，例如「嘩，呢個動作真係好有動感呀！」（同「隻雞好有雞味」有異曲同功之妙。）
姨甥女話想感受吓奧運氣氛，噚日帶佢去咗尖沙嘴文化中心外嘅奧林匹克廣場，入到去旅發局嘅展區，發覺有樣嘢幾好玩。
三面金牌換禮物
展區入面有WiFi，觀眾只要有部具WiFi功能嘅PDA，就可以玩遊戲；如果冇，大會有20部可以借用。其中「奧運全追蹤」比較好玩，佢會問你三條問題，每條都關於展板上面嘅圖片，例如「奧運有咩係代表五大洲」，咁你就要喺十幾塊展板內搵答案，即係奧運五環嘅圖片。如果搵到張圖，就用PDA對住佢，然後㩒確定，答案啱就可以攞到一面「電子金牌」，答錯要再㩒過，攞齊三面金牌就可以有禮物。
其他遊戲包括黃大仙電子求籤，又可以睇大熊貓盈盈同樂樂洗臉等短片。遊戲啱細路玩多啲，所以展區內大部份係細路仔，仲有一班喺度追住啲細路嘅父母。仲有，有樣嘢幾抵，就係山頂杜莎夫人蠟像館借咗包括有本地藝人陳慧琳嘅蠟像喺度展出，唔使錢可以影吓相，呢個合家啱玩。
逢周六、周日刊出
電郵：mailto:[email protected]