陳奕迅（Eason）噚日去咗台灣，宣傳新專輯《不想放手》，喺西門町聯合醫院廣場舉行簽唱會。Eason可能太耐冇去台灣見fans，所以一出現，即刻魅力沒法擋，但竟由「E神」變做「雨神」，因為噚日台灣落住滂沱大雨，不過E迷仍然熱情未減，一早到場等偶像，簽唱會舉行嘅時候雨更越落越大，積水甚至浸到去小腿，但係幾百個歌迷仍不為所動繼續冒雨排隊，Eason見到好開心咁話：「太值得了！」
積水浸舞台
Eason好心痛歌迷淋雨捧場，所以亁脆陪歌迷濕身演唱，令全場情緒沸騰，本來為顧及歌迷安全，佢只係唱一首歌，不過最後拗唔過熱情歌迷嘅不斷央求，佢忍唔住唱多咗兩首，呢個時候連舞台上面都開始有積水，雖然大家都唔肯走，但隨住Eason清唱最後一曲，全場好安靜咁欣賞完，活動亦正式結束。事後Eason無奈咁話：「可能是我沒跟老天爺簽合約，所以每場活動都下雨吧！」之後大會將簽名會移師到醫院的屋簷下繼續。
抽時間陪女
另外，Eason又提到對個女有愧，因為囡囡成日都問佢去咗邊？佢百感交集話：「該是放慢的時候了！希望調整工作與家庭的時間比例，越快實現越好。」乖女陳康堤已3歲多，佢哋父女相處時間好少，有時佢唔瞓覺撐到朝早送個女返學，佢仲笑自己嘅眼袋亦都越嚟越明顯。
