直至今時今日，好多人仲對XB360呢部鬼佬主機存有誤解，又話佢只有FPS同暴力血腥，想搵啲啱亞洲人口味嘅和風RPG簡直難過登天，真係解釋都解到瞌眼瞓。其實只要留意近月以嚟嘅動向，唔止有SquareEnix多隻RPG撐到行，連Namco旗下名作《Tales》亦登陸喺呢部強勢主機度，仲話360得《藍龍》嗰班友，想唔話你哋Out到爆都唔得。
文：陳福榮
《Tales》處子720p
基本上圍繞住PS家族嚟出嘅《Tales》系列，最架勢都係只有480i呢種低層次輸出，對於時下流行嘅普遍LCD芒甚至全高清規格，真係擺明唔夠力水。作為邁向次世代機嘅頭炮，《TalesofVesperia》（下簡TOV）嗰班開發人員充份發揮本身技術，將720p高清畫面嘅威力完全體現出嚟。始終藤島康介嘅人設向來畫風偏向動漫路線，同《FF13》接近CG真人取向好唔同，不難發現眼前嘅卡通Cel-Shading做得比前幾集出色，相比起當年《TOS》初試呢種手法已經進步好幾班喇。
場景宏偉深度夠
《TOV》故事佈局繼續以維持正義作為主題，講人類喺管制古文明魔導器嘅局勢下獲得片刻和平日子，這全建基於10年前嘅人魔大戰守得住。當魔物重整旗鼓大舉進攻，適逢皇帝駕崩帝位懸空，令整片大陸嘅和平受到考驗。以往《Tales》曾經喺預先繪製好嘅45度視點，以及全3D繪成畫面作為冒險舞台，但點都及唔上今集嘅優秀水準，無論戶內室外都好似睇緊繪本咁令人賞心悅目。
戰鬥進化仍親切
就算因應不同集數而產生變化，戰線式戰鬥一直都係本系列嘅傳統，角色方面都係高矮肥瘦男女樣樣齊，有專用魔法亦有擅長打鬥，當然玩家亦要為咗收集唔同稱號而繼續費神。
戰鬥系統亦有新點子，譬如好似《街霸4》咁承受一定敵方攻擊後會儲起左邊條Bar嘅OverLimit，合共有4種不同等級，肯定越儲得勁就越會有扭轉局面嘅效果；其間更可趁角色出絕招時發動BustUp增強威力。加埋喺特定情況先發動嘅FatalStrike與技能變化，從而令呢個戰線式戰鬥更添變化，善用招駁招令敵人瞬即構成重大損傷。
遊戲類型：RPG
對應機種：XB360
遊玩人數：1人
開發商：NBGI
售價：$299